وەزارەتی دەرەوەی عێراق ڕاگەیاندراوێکی لەبارەی ئەو پەلامارە چەكدارییە بڵاوکردەوە کە کرایە سەر خاڵێکی پۆلیس، پەرستگایەکی جووەکان (سیناگۆک) و دوو کڵێسا لە شارەکانی ماھاچکالە و دەربەنت لە کۆماری داغستان لە ڕووسیا.
لە ڕاگەیاندراوەکەدا، ھاتووە: “عێراق بە توندی سەرکۆنەی ئەو پەلامارە تیرۆریستییە دەکات کە لە کۆماری داغستان لە ڕووسیا ڕوویدا بەھۆیەوە ژمارەیەک کارمەندی ئەمنی و کەسی کوژراون و برینداربوون”.
وەزارەتی دەرەوەی عێراق لە ڕاگەیاندراوێکدا، پرسە و سەرەخۆشی خۆی ئاڕاستەی حکوومەتی ڕووسیا و کەسوکاری قوربانییانی پەلامارە تیرۆریستییەکە کردووە، ھەروەھا ھیوای زوو چاکبوونەوە بۆ بریندارەکانیش خواستووە.
ڕاشیگەیاندووە کە پێویستە کۆمەڵگای نێودەوڵەتی بەرپرسیارێتی خۆی بۆ ڕووبەڕووبوونەوەی تیرۆر لە ئەستۆ بگرێت و ئاماژەی بەوەشداوە کە بەھەموو شێوەیەک تیرۆر و توندئاژۆیی ڕەت دەکەنەوە.
دوێنێ وەزارەتی ناوخۆی ڕووسیا ڕایگەیاندبوو کە پەلاماری چەکداری کراوەتە سەر خاڵێکی پۆلیس، پەرستگایەکی جووەکان (سیناگۆک) و دوو کڵێسا لە شارەکانی ماھاچکالە و دەربەنت لە داغستانی ڕووسیا.
بەرپرسی کارگێڕی کۆماری خۆبەڕێوەبەری داغستانی سەربە ڕووسیا، ماڤسوم راگیمۆڤ ڕایگەیاند، ژمارەی ئەو کەسانەی لە ئاکامی پەلامارە چەکدارییەکەی شارەکانی ماھاچکالە و دەربەنت کوژراون گەیشتووەتە 21 کەس.